بایاتیلار
من عاشقم بو داشا
بو توپراغا، بو داشا
ائیله وور که، دشمنی
کله سیندن بو دآشا
یوخسولون ایشی یوخدور
پوللونون پولو چوخدو
تؤخ آجدان خبرسیزدیر
یئییبدیر قارنی تؤخدور
آرازدا آخار قالدی
ترلان اوچدو، سار قالدي
ائليمدن آيري دوشدوم
گؤزلريم باخار قالدي
عزیزیم بیل یاخشی
گؤزلرینی سیل یاخشی
دؤز دور، قیلینج برک کسه ر
کسمک اؤچون دیل یاخشی
سنده چیچک سنده گول
من آغلاییم، سنده گول
گئده ک دره ک بوستاندان
من شاماما، سنده گول
دمیردن چاخماق اؤلماز
یاندیریب یاخماقاؤلماز
او سوزولن گؤزلره
بیر لحظه باخماق اؤلماز
هر کؤمورده تین اؤلماز
هر ایگیدده کین اؤلماز
گل سیررینی مرده دئه
نامردلرده دین اؤلماز
ایگیت قلعه سین ایسته ر
داغین لاله سین ایسته ر
من بالامی ایسته ره م
بالام بالاسین ایسته ر
لای لای بشیگیم لای لای
ائویم ائشیگیم لای لای
سن گئت شیرین یوخویا
چکیم کشیگین لای لای
دامـنان دامـا گلـمیشم
گـؤل درمـاقا گلـمیشم
ایتیر میشم سؤوگیمی
آختـارمـاقا گلـمیـشم
عزیزیـم کیمی گـؤزلر
تارچالان سیمی گؤزلر
ساغ گؤزوم سنه قوربان
سؤل گؤزوم کیمی گؤزلر
عـزیـزیـم آلمـاقالا
بشـقابـا آلمـاقالا
نامرد گلیب مرد اؤلماز
بویونجا قیزیل قالا
آمـــرود آقــاجی هـاچا
الیم دولاشـدی سـاچا
بیر مرد اوغلان ایسترم
منـی گـؤتــوره قــاچــا
من عاشقم مرد اوغول
نامرده آغا، مرده قول
قورخاق تهمت گتیره ر
باش اوجالدار مرد اوغول
من عاشقم مردانا
سوز دئیه ره م مردانا
قورخاغا اوغول دئمز
قوچاق آتا، مرد آنا
آی ایله تک تک دوغار
گون بئله تک تک دوغار
سنین کیمی اوغولانی
آنالار تک تک دوغار
